हिन्दू धर्म राष्ट्र ।

हिंदूंचे ‘हिंदु राष्ट्र’ हवेच !
भारतात ‘हिंदु’ हा शब्द जरी उच्चारला, तरी निधर्मी म्हणवणार्यांना पोटशूळ उठतो. सर्व वृत्तवाहिन्या आणि प्रसारमाध्यमांची गरळओक चालू होतेे. गांधींच्या पावलांवर पाऊल ठेवून गांधी-नेहरू घराण्यातील नेत्यांनी भारताला ‘निधर्मी’ करण्याचा जणू विडाच उचलला. आजमितीस भारतात हिंदुत्वाची विचारसरणी असणार्या पक्षाची सत्ता असली, तरी अद्यापपर्यंत तरी हिंदूंच्या परिस्थितीत म्हणावा तसा पालट झालेला नाही. हिंदु हितार्थ आता ‘हिंदु राष्ट्र’ हाच पर्याय आहे.
१. भारताला ‘हिंदु राष्ट्र’ संबोधल्याने सेक्युलरवाद्यांना पोटशूळ !
‘गोवा राज्याचे उपमुख्यमंत्री फ्रान्सिस डिसोझा यांनी ‘मी हिंदु-ख्रिश्चन आहे’, तसेच ‘भारत हे हिंदु राष्ट्र आहे’, अशी विधाने केल्यावर समस्त सेक्युलरवाद्यांना पोटशूळ उठला. यात काहीच आश्चर्य नाही. भारताची जी घटना अस्तित्वात आली त्यात ‘सेक्युलर’ किंवा ‘समाजवाद’ हे शब्द नव्हते, हे सेक्युलरवादी विसरतात.
२. घटनेमध्ये गांधी घराण्याने ‘सेक्युलर’ आणि ‘सोशालिस्ट’ हे शब्द घुसडले !
घटना निर्मिती करणार्यांनी ‘हे राष्ट्र सेक्युलर आहे’, असे कधीही म्हटले नव्हते; परंतु नेहरूंनी तसे सांगायला प्रारंभ केला. वर्ष १९७४ मध्ये इंदिरा गांधी यांनी घटनेत ज्या काही दुरुस्त्या (तोडमोड) केल्या, त्यात त्यांनी स्वतःच्या आणि कम्युनिस्ट यांच्या दोन तृतीयांश बहुमतामुळे घटनेत ‘सेक्युलर’ आणि ‘सोशालिस्ट’ हे शब्द घुसडले. त्याविषयी जनसंघ आणि इतर हिंदुत्ववादी यांनी खेद व्यक्त केला; पण आकाडतांडव केला नाही.
३. जगाच्या पाठीवर एकही ‘हिंदु राष्ट्र’ नसणे, ही शोकांतिका !
जगात अनेक ख्रिस्ती राष्ट्रे आहेत. मुसलमान राष्ट्रे आहेत. बुद्ध राष्ट्रे आहेत. संख्येने सर्वांत अल्प असलेल्या ज्यू धर्मियांचे इस्रायल हे स्वतंत्र राष्ट्र आहे. तथापि जगात १०० कोटीहून अधिक लोकसंख्या असलेल्या हिंदूंना स्वत:चे असे एकही राष्ट्र नाही, ही शोकांतिका आहे.
४. भारताला ‘हिंदु राष्ट्र’ संबोधल्याससेक्युलरवाद्यांनी आक्षेप घेणे चुकीचे !
संघावरील पहिल्या बंदीच्या नंतर पू. गोळवलकर गुरुजींना एका युरोपीयन पत्रकाराने विचारले, ‘आपण हिंदुस्थान हा केवळ हिंदूंसाठी आहे, असे का म्हणता ?’ त्यावर पू. गुरुजी म्हणाले, ‘‘हे तुम्हाला पटत नसेल, तर हिंदूंकरता हिंदुस्थान हा एकमेव देश आहे, हे सत्य आहे, असे तुम्हाला वाटत नाही का ?’’ उर्वरित सर्व धर्मियांना आपापले देश आहेत. हिंदु ही आमची भौगोलिक ओळख आहे. त्यामुळे या देशाला ‘हिंदु राष्ट्र’ म्हटले, तर सेक्युलरवाद्यांनी आक्षेप घेता कामा नये. इंग्लंडची राणी ‘Defender of Faith’ म्हणवून घेते. अमेरिका ‘In God we trust’ म्हणते. काही मुसलमान राष्ट्रे आम्ही ‘शरीयत प्रमाणे राज्य करणारी इस्लामी राष्ट्र आहोत’, असे म्हणतात. हे सेक्युलरवाद्यांना चालते, तर ‘हिंदु राष्ट्र’ का चालत नाही ?
५. हिंदुत्वनिष्ठांनी घटनेत ‘हिंदु राष्ट्र’ असा पालट
केल्यास कोणलाही आकाडतांडव करण्याचा काय अधिकार ?
कम्युनिस्टांना बहुमत मिळून ते जर वरील पालट करू शकतात, तर उद्या हिंदुत्ववाद्यांना बहुमत मिळाले आणि त्यांनी ‘सेक्युलर’ ‘सोशालिस्ट’ शब्द काढून ‘हे राष्ट्र ‘हिंदु राष्ट्र’ म्हणून ओळखले जाईल’, असे नमूद केले, तर कोणालाही आकाडतांडव करण्याचा काय नैतिक अधिकार ?
आम्ही हिंदू इतके असंस्कृत, असभ्य आणि कोत्या वृत्तीचे आहोत का, की त्यामुळे आम्हाला भारताला ‘हिंदु राष्ट्र’ म्हणण्याचाही हक्क नाही. हिंदूंना स्वत:चे ‘हिंदु राष्ट्र’ असायला हवे, असे जर सेक्युलरवाद्यांना वाटत असेल, तर त्यांचा मेंदू सडका आहे, असे म्हटले पाहिजे.’
- श्री. वसंत गद्रे, मुंबई